မြန်မာ့ကြက်တောင်ရိုက်အားကစားသမိုင်းနှင့်အဖွဲ့ချုပ်

မြန်မာ့ကြက်တောင်ရိုက် အားကစားသမိုင်းကို ပထမအစဦးဆုံး မှတ်တမ်းတင်ခဲ့သူမှာ မြန်မာပြည်လုံးဆိုင်ရာ ကြက်တောင်ရိုက်အသင်းချုပ် ပြန်ကြားရေးမှူးဟောင်း ဦးသိန်းဖြစ်သည်။ ဦးသိန်းသည် ကြက်တောင်ရိုက် ကစားနည်းစာအုပ်ကို ၁၉၅၂ ခုနှစ် ဇန်နဝါရီလတွင် ရေးသားထုတ်ဝေခဲ့သည်။ ဦးသိန်း၏ကျေးဇူးကြောင့် ၁၉၁၀ ခုနှစ်ခန့်တွင်မြန်မာပြည်၏ ကြက်တောင်ရိုက် ကစားနည်းစတင် ပေါက်ဖွား လာခဲ့သည်ဟု သိမှတ်ရပေသည်။

မြန်မာပြည်၌ကြက်တောင်ရိုက်ကစားနည်း ပေါက်ဖွားလာသည့်ကာလကို သိမှတ်ရပြီးနောက် အခြေအမြစ် အတိအကျကို လေ့လာစူးစမ်းသောအခါ မြန်မာပြည်တွင် ကြက်တောင်ရိုက်ကစားနည်း မျိုးစေ့ချ၍ စတင်စိုက်ပျိုးလာခဲ့ပုံ အဆင့်ဆင့်ကိုအရိပ်ထင် သိမြင်လာခဲ့ရသည်။ ကြက်တောင်ရိုက်ကစားနည်းသည် မြန်မာ့ရိုးရာကစားနည်းမဟုတ်၍ မြန်မာပြည်တွင် ယခင်က ဤကစားနည်း မရှိခဲ့ကြောင်းကို အထူးပြောရန်ပင်မလိုတော့ချေ။ ကြက်တောင်ရိုက်ကစားနည်းကို မျိုးစေ့ကိုပြည်ပမှ ယူလာ၍ စတင်စိုက်ပျိုးသူများမှာ ထိုအချိန်ကာလက အုပ်စိုးသူအင်္ဂလိပ်လူမျိုးများပင် ဖြစ်ပေသည်။

သို့သော် အမျိုးသမီးကစားနည်းဟု ပထမအစတွင် အမျိုးသားများက ယူဆပြီး ပစ်ပယ်ထားခဲ့၍ အမျိုးသမီးများ၊ အထူးသဖြင့် ခရစ်ယာန်အမျိုးသမီးများကသာ စတင်ကစားခဲ့ကြသည်။ ထို့နောက်မှအမျိုးသားများ တဖြည်းဖြည်းပါဝင်ကစားလာခဲ့သည်။ နောက်ပိုင်းတွင် အင်္ဂလိပ်အရာရှိကြီးများသည် မိမိတို့မိသားစု ကျန်းမာရေးအတွက် ကိုယ်လက်လှုပ်ရှားမှုအဖြစ် မိမိတို့ခြံဝင်းအတွင်းတါင် စတင်ကစားခဲ့ကြ၏။ ထိုမှတဖန် မိမိတို့နှင့်အမျိုးတူ အဆင့်တူချင်း ကျန်းမာပျော်ရွှင်ရေးနှင့် ချစ်ကြည်ရင်းနှီးရေးအတွက် စုပေါင်းကစားလာခဲ့ကြ၏။

နောင်တချိန်တွင် အိန္ဒိယလူမျိုး အရာရှိကြီးများကလည်း အင်္ဂလိပ်လူမျိုးတို့ကို အတုယူ၍ကစားခဲ့ကြရာမှ တဆင့် အင်္ဂလိပ်နှင့် အိန္ဒိယလူမျိုး ဂုဏ်ရည်တူအရာရှိကြီးများ ရောနှောပူးပေါင်း ကစားလာခဲ့ကြပေသည်။ အုပ်စိုးသူ ဂုဏ်သရေရှိသူများသာ ကစားခြင်းကြောင့် ကစားသမားတို့၏ အဝတ်အစားမှ ဖြူစင်သန့်ရှင်း သပ်ရပ်၍ လူသာမန်တို့အထင်တကြီး ငေးကြည့်ရလောက်အောင် ဖြစ်ခဲ့ရသည်ဟုဆို၏။ ကစားသမားတို့၏ အဆင့်အတန်း၊ ဂုဏ်သရေနှင့် အဝတ်အစား ဟိတ်ဟန်တို့ကြောင့်လည်း ကြက်တောင်ရိုက်ကစားသမာကို ပိုမိုအထင်ကြီး လေးစားထင်ပေါ်စေခဲ့ရ၏။ မြန်မာကြက်တောင်ရိုက် အားကစားနှင့်ပတ်သက်ပြီး ကြံဖန်၍ကြွားဝါဂုဏ်ယူလိုလျှင် မြန်မာကြက်တောင်ရိုက် အားကစားသည် တချိန်တခါက ရွှေထီးဆောင်းခဲ့ဖူးသည်။ တနည်းအားဖြင့် ရွှေလင်ဗန်းဖြင့် အချင်းဆေး၍ မွေးဖွားခဲ့သည်ဟု ပြောနိုင်ပေသည်။

အဘယ်ကြောင့်ဆိုသော် အချိန်တခါက တနည်းအားဖြင့် ကြက်တောင်ရိုက်ကစားနည်း မြန်မာပြည်တွင် စတင်ပေါက်ဖွားလာခဲ့သည့်အချိန်က ဂုဏ်သရေရှိအုပ်စိုးသူတို့၏ လက်ထဲ၌ မွေးဖွားကြီးပြင်း၍ ရှင်သန်လာခဲ့ သောကြောင့်ပင် ဖြစ်လေသည်။ ထိုကဲ့သို့ အုပ်စိုးသူ ဂုဏ်သရေရှိ လူတစုလက်ထဲမှ မြန်မာပြည်သူလူထုရင်ခွင်သို့ ကြက်တောင်ရိုက်ကစားနည်း တစတစ ကူးပြောင်းကျယ်ပြန့်လာပုံကို အကျဉ်းမျှ ဖော်ပြလို၏။ အထက်ကဖော်ပြခဲ့သည့်အတိုင်း အင်္ဂလိပ်နှင့် အိန္ဒိယလူမျိုး ဂုဏ်ရည်တူအရာရှိကြီးများ အချင်းချင်းရောနှော ကစားရာသို့ မြန်မာအရာရှိကြီးများလည်း တဖြည်းဖြည်း ပါဝင်လာခဲ့ပြီးနောက်တွင် အိန္ဒိယနှင့် မြန်မာလူမျိုး ရုံးဝန်ထမ်းများထံသို့ ဆင်းသက်ကူးပြောင်းလာခဲ့၏။ ရုံးဝန်ထမ်း၊ ရုံးဝန်းကျင်မှတဆင့် ရပ်ကွက်လူထုထဲသို့ တစတစစိမ့်ဝင်သွားခဲ့၏။